女鐵騎.青甘大環線|3000公里
 
如果有得比你揀去歐洲同中國旅行,相信大家都係會揀前者,有幾可會去中國旅行,但係中國既景同外國一樣都咁靚,
係空曠、鳥無人煙既地方;好想繼續探索中國,人生有幾多時間比我咁做呢
 
 
事源:李小姐既行李無由香港寄到去海口 延誤左 因為要辦理行李遺失同埋轉機安排
~時間關係 我地上唔到另一班由海口去西寧既飛機
一次既黑仔係唔夠既 因為搭唔到中轉既飛機 令我地回程既機票都被取消 旅程尚未開始就已經滯留左係海口
絕望既我地期間不斷打電話比航空公司或代理公司了解情況 航空公司以及代理都互相推搪責任
係無計可施既程況下 我地都好希望可以盡力趕上行程 安全安頓好後 又再重新訂購整個旅程重新出發 好多謝當地旅館的職員幫忙訂票 ☺️
結果係中午時分 因打風再次收到航空公司取消17號的行程😊 
我地又再重新面對第二程航行既損失 不過呢 勇敢面對既我地積極去訂購第三次航班
因為未有收到任何航空公司既回覆 我地繼續努力倒錢落海💸yeahhhh 
今倘旅程雖然困難重重 但係每一個過程都可以讓我地加以學習 係海南呢個地方識到啲新嘅朋友
途中加插一啲新嘅旅程 新既體驗「塞翁失馬,焉知非福」我哋會繼續我哋嘅旅程唔會咁容易放棄
由於不斷有意外發生 令行程不斷拖延、更改 但最後亦都可以趕上行程 去到必要去的景點
同時又安全完成返回香港 確實要比掌聲自己同李小姐
 原本應該電單車環完青海湖先租車 而家決定租車去租電單車既地方 還電單車個陣就可以直接揸車出發 盡量節省時間 
波折1 : 好多中國既租車店都需要用國內信用卡去比押金 但我地唔會有中國信用卡 所以好多大型既租車店都未必租到車
我地原本諗住比現金都無問題 最後搵左幾間先肯租 * 證明微信支付係中國既重要性
以下為呢十日的行程 :
第一天 15/9:香港 > 海口(因行李延誤,導致於海口停留)
第二天16/9:滯留於海口(重新買機票 17/9 出發至西寧)
第三天17/9:滯留於海口(因山竹颱風令航班取消,重買機票至西寧)
第四天18/9:海口 > 昆明 (停留 13小時,到西山一遊 ) > 西寧 
第五天19/9:西寧(租車)> 西海 (租摩托車一天遊)> 青海湖 > 西海(還摩托車,再出發大環線)
第六天20/9:青海湖(日出)> 茶卡鹽湖 > 懷頭他拉鎮 > 大柴旦鎮 (車子報銷,需維修)
第七天21/9:大柴旦鎮(處理保險、租車公司及警局錄口供) >大柴旦鎮(雪山溫泉及 翡翠湖)
第八天22/9:拼車=大柴旦鎮 > 中國最美公路 > 魔鬼城 > 敦煌 > 月牙灣 ( 露營 )
第九天23/9:月牙灣 > 敦煌火車站 > 張掖站 > 甘州巷子 (夜市)
第十天 24/5 :張掖 (七彩丹霞及冰溝丹霞) > 張掖機場 > 蘭州 > 深圳機場 > 香港
 
|記錄第五天 — 青甘大環線|

朝早成功租車後我地已經出發去西海鎮拎預約左的電單車 未入到西海鎮電話信號開始收唔到搵唔到大家 
去到會見到好多族種既中國人 有回族(清真)、藏族、漢族等沿途都有好多佢地既特色小食 係出發去青海湖之前 我地試左租車旁的清真餐廳
店既侍應好熱情推介我地食當地既羊肉鍋 雖然最尾無食哈 佢都好熱情同我地傾左成餐飯 邀請我地夜晚番去食佢地既主打菜
大家有機會要食佢地既蒙牛肉片好好食  #王文凱 #已約定下年係寧夏見哈 see you my friend

《開始電單車之旅》

電單車同私家車既分別就係電單車真係好凍好凍同好凍!原本好型咁唔帶面巾手套頭盔(大家唔好千其唔好學我地)
青海湖既溫度係可以由下晏既14、5度 跌到去夜晚既3、4度 所以成程都係凍到手指腳趾疆硬哂 塊面同咀唇都吹到爆察 好辛苦的
但係青海湖既美景真係一流 沿路既風景靚到你會想每分每秒都想落車影張相先再走
可以有牧人係馬路趕山羊 海量既草原 萬馬奔馳 仲有好多藏族既七彩顏色帳篷美得很

騎電單車(150CC)但係高原下就算你比盡油佢最多只可以上到去60-70km/hr 所以當你騎車既時候永遠都會有好多車係你隔離駛走哈
我地就當係多贏左欣賞美景既時間 騎到去金沙灣 貪玩既我地忍唔住要停低玩喇
果到有無數個沙丘有沙地四驅車 原本150$從沙丘到青海湖旁邊一轉 既然我地有電單車直接騎落去錢都免了哈
然後黑仔既事又開始發生了 開始路段既沙比較硬 對玩開越野電單車既李小姐表示輕鬆
但後段既沙路開始鬆啲沙好幼 車既輪又唔岩行沙路 加上徐小姐我實在太胖了 我地係沙到摔左幾次 好彩係沙地大家都無傷
係沙地繼續玩跑跑跳跳 車都比我地摔到倒後鏡同手把都爛早有準備既 李小姐帶齊哂功具整車!叻女!
然後我摸一摸袋入面既電話想影下佢既英姿 好耶電話跌左!又唔見電話!PS好多揸電單車好型既相就咁就無左嗚嗚
 
《塞翁失馬焉知非福 第二回》
因為唔見左電話就搵當地人 想叫佢地幫手騎沙地四驅車帶我落去沙丘 搵番電話老闆知道之後就即刻帶我落去搵
因為沙島好大都好難搵番原本走既路線 但佢都逐條路同我搵一次 雖然最尾都搵唔番
但免費坐左半個鐘四驅車正 再同老闆傾一傾先知道佢係藏族人 為左多謝佢我地決定夜晚請他食飯
但因為要回程至西海鎮還電單車再開車找他 再見面時已經九點多
好多餐廳都關了 老闆二話不說帶我地去佢家吃藏族 菜一開始已經介紹佢既屋企人
比我地識(應該都有十個) 佢話都係第一次帶人番屋企食飯哈

藏族出名既蒙牛奶茶、清炖羊肉、羊肉包子、粉條都拿給我們食仲有自製酸奶!!啊!!超好食!
互相學左大家既語言後 因為我地第二日仲要趕去黑馬河睇 日出老闆帶我地去朋友開既旅店住 然後傾到完全唔捨得走
最後問佢房點計錢佢一句話「不用沒事!」太帥了吧 謝謝喔 #關卻加 PS 無熱水沖涼

長知識:藏族人原來都會去唔同國家朝拜,如拉薩、泰國、尼泊爾等
#已約定與關卻加在尼泊爾見
 
| 記錄第六天 · 青甘之旅 驚心動魄的一日|
大環線既旅程終於開始 目的地之間大部分都係行走高速公路 服務點的位置大約有50至100公里既距離 途中想搵野食都難
所以每次到達小鎮既時候都要補充一定既食糧 青海湖出產既牛奶、酸奶都推薦大家去試
本地食物都值得一試 你在香港會完全吃不到這水準的菜 
《 青海湖之日出 》
早上我哋大約五點起身出發去黑馬河看日出 我哋背向太陽行駛 隨住日出時間天空顏色不停改變 望著那個漸變的天色
黃拼紅拼藍的層次 感覺很療癒 七點正式開始日出 一種帶住希望又拼勁既一日又開始了
一直行駛 大約八點多 終於到咗寫住青海湖的打卡景點 羊頭掛上羚角 感覺很酷、帶著有一種威嚴
 
《茶卡鹽湖》
越過青海湖 下一個目的地就係有「天空之鏡」之稱既茶卡鹽湖 青海湖距離茶卡鹽湖大約200公里
往茶卡鹽湖途中既雪山繞道都好靚好靚 就好似去左小瑞士一樣 我地忍唔住要停車影下相 
中午時份我地終於到達茶卡鹽湖 景點門票¥70一位 可以選擇電瓶車帶到步行入口
亦可以選擇以小火車¥50來回天空之鏡終點站 我地決定散步過去感受沿途景色
地下鋪住雪白既鹽粒 跟雪一樣 好美麗
《路經 — 懷頭他拉鎮》

大約四點再繼續路程 下一個目的地是大柴旦鎮 這裡日照時間比較長 繼續趕路怕會餓壞 所以決定係最後200公里既懷頭他拉鎮休息先吃過晚餐 

當地既餐館比較多以家庭形式經營 當老闆忙住煮食既時候 做緊功課既囡囡會主動為我地倒茶點菜
然後我地又開始同老闆傾計 呢邊既人都好熱情 除了幫我地帶路外 仲帶我地去佢地屋企 請我地食自己種既新鮮枸杞
香港的都係乾貨 我地異口同聲講好食! 完全沒有想過新鮮既枸杞係咁甜 都唔知有呢個生果存在
老闆送左一大包比我地上路食 多好☺️
《意外發生》

晚飯過後 離大柴旦鎮仍有200公里 兩多小時的駕駛時間 還有10多公里時 晚上11點 一隻小動物從草叢跑出馬路
為避開動物而衝至下跛撞上了圍欄 幸好我地都無受傷 但車子就報銷了 不能開動 
冷靜下來後 立刻致電110報警 因沒有任何人受傷 故沒有派交警到場 只給了拖車公司的電話(令我們不滿的地方)
其後一直在致電去處理保險公司、租車公司的事 當晚溫度應該只有七、八度 受著驚嚇又冷的感覺 很不是味兒 拖車公司最後大約零晨兩點才到
把壞車拖至鎮上 等到明天保險公司的人才到 看車的損壞程度

因大柴旦港澳通行証並不流行 租賃系統未完善 無我地的記錄 某旅館拒絕我地入住 雪上加霜 幸好最後有間旅館的老闆體諒我地
最後大約四點才安頓好所有事情休息 當刻我倆的心情仍非常沈重 但相信「聽日一定會好天既!訓醒再算!」
 
TIPS 各位如想在中國自駕遊
要提一提大家 呢邊公路會有好多小動物出沒 行車時要小心 ; 留意「多事故路段」要注意減慢車速 ; 盡量不建議晚上趕路
路邊街燈甚少 看不清路段 發生意外 ; 很多公路 都有限速 注意不要超速 如有罰票 國外人處理會變得很麻煩;
除左每日都有意想不到既倒霉事發生外,其實我地成程旅行都好開心的,自娛呢方面我地完美勝出;
除在我地青甘既行程由十日縮短到得番六日外,其實我地仲去左多左好多青甘以外既地方的;
中國真係好美,每日都係到讚嘆呢個地方;

由於時間關係 九月二十五日 我同李小姐終於安全回到香港了 辛苦各位擔心過我地既朋友同家人哈
旅途中發生太多意料之外既事 亦都因中國既網絡 令我地未必可以同大家即日交代行程或所發生既事
我地都會慢慢將旅行既相、片段、所遇到的朋友、行程、要注意既地方等分享比大家

 
FACEBOOK: 記錄瑪莉. 流 離 浪 蕩 |
YouTube: https://youtu.be/dp9RJBzI20E
INSTAGRAM:  MARYUNGA
/
評分
(0)
相冊
分享至
FacebookTwitterWhatsAppPinterest

發表回覆